LAOAG CITY – Inpasigurado ni Senador Sherwin Gatchalian a ti nailungalong a 2026 national budget ket mapaalisto na ti pannakaipatakder dagiti classrooms tapno masolbar ti panagkurkurang ti problema kadagiti kangrunaan a pasilidad ti edukasyon.
Inbatad ni Gatchalian, chairman ti Senate committee on finance, a ti 2026 national budget ket mangted iti Flexibility iti Department of Education (DepEd) no maipapan kadagiti modalities para iti classroom construction, agraman ti public-private partnerships.
Kuna na a saan da laeng a nangilatang ti dakdakkel a pondo para iti pannakaipatakder dagiti classrooms no di ket siguradwen na pay a mapaalisto daytoy babaen ti aktibo a pannakipaset iti nagduduma sektor.
Basat iti opisina ni Gatchalian, P85 billion ti nailatang iti nailungalong a 2026 budget para iti construction ken rehabilitation dagiti classrooms.
Innayon ni Gatchalian a babaen iti nasao a gatad ket P65.9 bilion ti nairanta para iti pannakaibangon, pannakasukat, ken pannakaileppas dagiti pasdek ti kindergarten agingga iti sekondaria, kasta met kadagiti technical-vocational laboratories.
