LAOAG CITY – Inpakaammo ni Fire Inspector Roy Bonoan, Municipal Fire Marshal ti Bureau of Fire Protection iti ili ti Pasuquin nga umabot iti sumurok-kumurang 24 a milyon a pisos ti balor iti pannakadadael iti pannakauram ti Pasuquin Public Market.
Segun kenkuana, naminpinsan a dimmapo dagiti amin a puesto nga adda iti maikadua a kadsaaran ti tiendaan pakairamanan ti paglakoan ti ukay-ukay, tailoring shop, pawnshop, printing shop ken dadduma pay.
Inbatadna a basar iti inisyal nga imbestigasionda, posible a ti nagrugian ti uram ket ti waya ti kuriente wenno dagiti ubbing a napan iti maikadua a kadsaaran a mabalin a nagay-ayam ti apoy a nangitunda ti uram.
Inlawlawagna a basar iti obserbasionna ket saan a nairanta ti napasamak nga uram.
Kunana a nagsubli metten dagiti aglaklako nga adda iti umuna a kadsaaran ti tiendaan.
Maipalagip nga agarup dua nga oras a nagpaut ti uram no sadinno a nangrugi daytoy iti oras ti 09:37 ti bigat idinto a naideklarar a fire out iti oras ti 12:15 ti pangaldaw.
Immuna iti daytoy, inpasingked ni Mayor Robert Aguinaldo a maipaayan ti tulong dagiti naapektaran ti uram idinto nga inpakaammo met ni Vice Mayor Kit Aguinaldo nga adda ti naisayangkat nga special session tapno mapagsasaritaan ti pannakaiyakar dagiti market vendors iti maar-aramid a baro a tiendaan.
