LAOAG CITY – Inpaganetget ni Assistant General Manager Perry Martinez ti Ilocos Norte Electric Cooperative wenno INEC a seryosoda iti panangipataw ti pannusa kadagiti agtakaw ti kuriente ken kadagiti agaramid ti iligal iti kooperatiba a makaapektar kadagiti member-consumer owners.
Segun kenkuana, iti baet a saan a maragsakan nga adda dagiti mapilaan ti kaso ngem masapul nga aramidenna daytoy tapno saan nga agtultuloy a ngumato ti systems loss a daytoy ket maipasa met laeng kadagiti member-consumer owners.
Gapu iti daytoy, nagturong manen ni Martinez iti City Prosecutors Office tapno pilaan ti kaso ti dua a member-consumer owners manipud ditoy siudad ti Laoag.
Inbatadna nga adda ti lima a pakabuklan dagiti napilaan ti kaso gapu iti panagsalungasing iti anti-pilferage law manipud pay idi bulan ti Disiembre iti napalabas a tawen.
Mainaig iti daytoy, immapela ni Martinez nga isardengdan daytoy nga aramid gapu ta narugianen a naipababa ti presio ti kuriente no sadinno a posible a daytoy ti mangitunda a ngumato no agtultuloy nga adda dagiti agtakaw ti kuriente.
Inlawlawagna a saan a ti Ilocos Norte Electric Cooperative ti maatiwan iti daytoy no diket dagiti met laeng member-consumer owners nga agbaybayad ti husto.
Naammoan nga adda ti 196 a ribu a member-consumer owners.
Kabayatanna, basar iti datos ti kooperatiba nga awan pay maysa a porsiento dagiti adda ti problemana ngem no mai-convert ti kilowatt-hour ket dakkel ti pagbibingayan amin daytoy.
