LAOAG CITY – Possible a maimbitaran manen iti sumaruno a panagdengngeg ti Senate Blue Ribbon Committee ni dati nga House Speaker Martin Romualdez wenno mangibagi ti Securities and Exchange Commission (SEC).
Daytoy ket basar ken ni committee chairman Senador Panfilo Lacson tapno malawlawagan ti isyu iti panaggatang ti balay ken lote iti No. 30 Tamarind Road, Makati idi 2023, a ginatang ti kompanya a Golden Pheasant Holdings Corp., a kukua ni Jose Raulito Paras, a konektado iti dati nga speaker.
Segun ken ni Sen. Lacson, no kayat ti agatendar ti dati nga speaker ket nawaya a mapan agatendar ken ilawlawag ti kabibiangan na.
Nupay kasta, saan da a mabalin a piliten a mapan agatendar gapu iti inter-parliamentary courtesy.
Imbitaran da pay ni Paras iti sumaruno a panagdengngeg tapno ilawlawag ti financial capacity na iti panaggatang ti nasao a balay nga adda ti nginngina na gapu ta agbalor ti saan a nababbaba ngem ₱1 billion.
Maipalagip nga iti maikawalo a panagdengeng ti komite iti flood control anomaly idi Lunes ket rimuar ti dua a babai a testigo ken naukir iti maipagarop a koneksyon da dati nga house speaker ken kontratista a ni Curlee Discaya mainaig iti maipagarop a ginatang a balay ken lote ni Romuldez idi Abril 2023 iti South Forbes Park, Makati City.
Adda dagiti report a dagiti Discaya ti maipagarop a nausar a “front” iti pananggatang iti nasao nga high-end property.
Nupay kasta, agpada a naglikudan da Romualdez ken Discaya dagiti alegasyon kontra kadakuada.
Kabayatanna, immunan nga inbatad ni Sen. Lacson a possible nga agsentro ken ni dati a Department of Public Works and Highways Secretary Manuel Bonoan ti sumaruno a panagdengngeg tapno lawlawagan dagiti isyu iti saan nga umiso a grid coordinates ti flood control projects a nailanad iti report na ken ni Presidente Ferdinand Marcos Jr.
Segun ken ni Lacson, iti napalabas a panagdengngeg, inpakita da Undersecretaries Arthur Bisnar ken Ricardo Bernabe III ti datos a mangipakpakita ti nalawag a pattern ti saan nga usto a coordinates.
Innayon ni Lacson a ti saan nga umiso a datos ket mabalin a saan laeng a tapno idiscredit ti website a Sumbong sa Pangulo, no di ket tapno pakapuyen ti kaso kontra kadagiti “ghost” flood control projects.
