LAOAG CITY – Inpasingked ni Mrs. Perlita Cabello, mangidadaulo ti City Social Welfare and Development Office a naiget ti panangtutukda iti Bahay Silangan ditoy siudad ti Laoag.
Segun kenkuana, adda ti panangbalakadda kadagiti maseknan nga indibidual a nagusar ti iligal a droga tapno ad-adda nga agbalbaliw dagitoyen manipud iti dakes nga aramid.
Inbatadna nga adda pay ti maiwaywayat a counselling para kadakuada tapno maiyadayo dagitoy kadagiti iligal nga aktibidad.
Inlawlawagna nga ad-adalenda no ania ti interes dagiti maseknan tapno daytoy ti isuroda kadakuada.
Kunana a malaksid kadagiti maipapaay a tulong kadakuada ket adda pay ti pannakikammayetda iti Technical Education and Skills Development Authority (TESDA) para iti sabali pay nga skills training.
Innayonna a karaman iti skills training iti pannakaipaadal iti foot-spa, manicure wenno pedicure ken dadduma pay.
