LAOAG CITY – Inwaragawag ti European Union ken India ti maysa a pakasaritaan a trade deal kalpasan ti agarop dua a dekada nga on-off a dayalogo.
Gagem ti katulagan nga ad-adda pay a mapatibker ti relasyon iti agsumbangir a partido iti baet ti tension iti Estados Unidos.
Inawagan ni European Commission President Ursula von der Leyen ti katulagan kas “historic”.
Immuna iti daytoy, nagturong da Von der Leyen ken European Council President António Costa idiay Delhi no sadinno a nagtataripnong da kada Indian Prime Minister Narendra Modi iti bilateral summit.
Kabayatanna, iti babaen ti katulagan ket mapalubusan ti libre a paglako kadagiti tagilako iti nagbaetan ti bloc ti 27 nga European states ken ti kaadoan ti populasyon na iti lubong, nga agkakadwa a mangbukel ti agarop 25% ti global gross domestic product ken ti maysa a merkado dagiti agarop dua a bilyon a tattao.
Manamnama a dakkel ti pagbabaan ti taripa ken ad-adda a mapalawa ti access iti merkado para iti agsumbangir a partido.
