LAOAG CITY – Bailligi ti pannakitaripnong ti lokal a gobierno ditoy ciudad ti Laoag, Department of the Interior and Local Government ken Provincial Drug Enforcement Agency kadagiti opisyal dagiti 35 sa barangay ditoy ciudad a saan pay a naideklarar kas drug cleared.
Daytoy ti inpakaammo ni Ms. Charis Garma, ti mangidadaulo iti Department of the Interior and Local Government ditoy ciudad ti Laoag.
Kunana a kadagupan kadagiti 80 barangay ditoy ciudad ti Laoag ket 43 ti drug-cleared, 2 ti drug-free ken 35 pay ti saan a na nadalusan manipod iti illegal a droga.
Inbatad na a napagsasaritaan iti naiwayat a taripnong no ania dagiti rumbeng a maaramid ken kasanu ti panagaplikar para iti panagbalin a drug cleared ti maysa a barangay.
Innayon na a napateg ti akem ti Barangay Anti-Drug Abuse Council (BADAC) para iti natalna a komunidad tapno malapdan wenno maparmek ti operasion ti illegal a droga.
