LAOAG CITY – Padpadaanan ti Department of Justice (DOJ) ti warrant of arrest nga iparuk-at ti San Pablo, Laguna Regional Trial Court (RTC) kontra iti negosiante a ni Charlie “Atong” Ang nga adda ti pakainaiganna iti sangsangoenna a kaso a kidnapping mainaig kadagiti mapukpukaw a mammallot.
Inbatad ni Prosecutor General Richard Anthony Fadullon nga awan pay ti impormasionda ken mangiwaywayatda pay laeng ti naan-anay a detalye maipanggep iti daytoy.
Inlawlawagna nga am-ammoenda no apay agingga ita ket awan pay ti inparuk-at a warrant of arrest ti nasao a korte.
Nupay kasta, kuna ni Fadullon nga addan ti dua a korte a nangiparuk-at ti warrant of arrest kontra ken ni Ang ken dagiti padana nga akusado mainaig iti sangsangoenda a non-bailable cases.
Immunan a nangiparuk-at ti warrant of arrest kontra ken ni Ang ken dagiti padana nga akusado ti dua nga RTC idiay Lipa City, Batangas ken Sta. Cruz, Laguna gapu iti pakabuklan a 25 a bilang ti kaso a kidnapping a naipila kontra kadakuada.
