LAOAG CITY – Mamati ni Pusong Pinoy Party-list Rep. Jett Nisay a saanen a “Fit” a mangidaulo iti pagilian ni Presidente Ferdinand Marcos Jr.
Nagtalinaed ti takder ni Nisay a sufficient in substance ti impeachment complaint a naipila kontra ken ni Presidente Marcos.
Inpetteng ni Nisay a karaman kadagiti akusasyon kontra iti presidente ket ti culpable violation of the Constitution, betrayal of public trust, ken graft and corruption.
Basar iti reklamo, maipagarop a linabsing ti administrasyon ti Konstitusyon iti maipagarop a panang-bypass iti justice system, partikular iti isyu ti pannaki-koordinar iti International Criminal Court (ICC).
Nadakamat pay iti reklamo ti maipagarop a pannakairaman ti presidente iti isyu ti pannakaikabil ni dati a Presidente Rodrigo Roa Duterte iti International Criminal Court, nga inladawan dagiti agrekreklamo kas maysa a klase ti kidnapping ken panaglabsing iti soberanya ken karbengan iti due process.
Innayon dagiti complainant a napateg ti moral a pagsungsungbatan ti gobierno, aglalo iti panagusar ti pondo para kadagiti programa a maibagbaga a mangpapigsa ti seguridad, imbes a direkta a solusyonan dagiti problema ti umili.
Inrakurak da ti pammati a kasapulan nga agsungbat dagiti opisyal tapno saanen a maulit dagitoy a problema iti masangwanan.
Karaman pay iti reklamo ti alegasyon ti agtultuloy a problema iti ilegal a droga, a maipagarop a saan nga epektibo a nasolusyunan ti agdama nga administrasyon.
