LAOAG CITY – Inimbitaran ti maysa nga opisial ti Philippine Coast Guard (PCG) ni Senador Rodante Marcoleta a bumisita iti Kalayaan Island Group.
Iti baet daytoy ti isyu ken panangbabalaw iti Senador gapu iti maipagarup a rakurakna nga isuko laengen dagiti nasao nga isla gapu ta saan met a paset ti Exclusive Economic Zone.
Inbatad ni Commodore Jay Tarriela, pannakangiwat ti Philippine Coast Guard iti West Philippine Sea, mamati daytoy a maysa a makabayan a public servant ni Marcoleta a kabaelanna a tumakder para iti karebbengan iti pagin-innagawan a teritorio.
Mainaig iti daytoy, inrekomendar ni Tarriela a sumurot ni Marcoleta iti maysa a Maritime Domain Awareness Flight iti Kalayaan iti mabiit.
Inlawlawagna nga awan ti rumbeng a pagdanagan ti agpanpanday linteg ken nakasagana ni Tarriela nga urnosen mismo no inton a maiyuswat ken kaduaenna pay isuna iti operasion.
Inpetteng ti opisial a sigurado a maragsakan dagiti residente ti Pag-asa no bilang bumisita kadakuada ni Marcoleta.
Immunan a nababalaw ti Senador gapu iti nagbalin a rakurakna ngem inlawlawagna a saanna a dinakamat a nasken nga ited lattan ti Kalayaan Island Group.
Umabot iti 400 a residente ti Kalayaan a maysa a munisipalidad a sakupen ti Palawan.
