LAOAG CITY – Naisayangkat ti Dragon Dance iti sango ti Laoag City Hall kas panangselebrar iti Chinese New Year.
Linikos ti Dragon Dance dagiti nagduduma nga opisina iti Local Government Unit kas pammati a maiyabog dagiti malas nga elemento.
Ti panangselebrar ti Chinese New Year ket addan ti sumurok tallo a ribu a pakasaritaan a nangrugi idi panawen ti Shang Dynasty idiay China.
Daytoy ket basar iti lunar calendar isut gapuna nga agbalbaliw ti petsa iti kada tawen a masansan nga adda iti nagbaetan ti Enero 21 ken Pebrero 20.
Nabayagen a paset ti kultura ditoy Pilipinas iti pannakaselebrar ti Chinese New Year gapu iti koneksion dagiti Pilipino ken Tsino sakbay pay a simmangpet dagiti Espanyol.
Kabayatanna, nagatendar iti nasao nga aktibidad da Mayor James Bryan Alcid, Vice Mayor Rey Carlos Fariñas ken dagiti kameng ti Sangguniang Panlungsod pakairamanan dagiti Department Heads.
