LAOAG CITY – Naiget ti panagsagsagana ti Ilocos Norte Police Provincial Office para iti seguridad iti maisayangakat a Tan-ok Festival iti Ferdinand Edralin Marcos Stadium ditoy siudad ti Laoag.
Segun ken ni P/Maj. Kristian Lee Badua, pannakangiwat ti Ilocos Norte Police Provincial Office, umabot iti 648 a kameng ti nailian a pulisia ti mai-deploy iti aglawlaw ditoy siudad nangruna iti Marcos Stadium.
Inbatadna a manamnama nga adda pay ti mainayon gapu ta adda ti augmentation-da manipud kadagiti nagduduma a Local Government Units ken Provincial Government of Ilocos Norte gapu ta naruay a residente ditoy probinsia ti makirambak pakairamanan dagiti bisita manipud iti sabali a lugar.
Inlawlawagna a dagiti naiget a maipawil a banag a maiserrek ket kas ti illegal substance, alcohol drink, explosives and pyrotechnics, noisemakers, offensive materials, single use plastics, taraken a dingwen, laser pointers, drones ken professional equipment.
Kabayatanna, naammoan a ti entry point ket masarakan iti agsinnungbangir a paset ti stadium para kadagiti maibilang a Very Important Persons wenno VIPs idinto a ti sango ti stadium para iti general admission.
