LAOAG CITY – Rinugianen ti Independent Commission on Infrastructure (ICI) ti turnover dagiti dokumento iti Office of the Ombudsman kagiddan ti rakurak ni Presidente Ferdinand Marcos Jr. a natungpalen ti komision ti gagem daytoy.
Simmangpet ti dua a truck ti pulisia a kargana dagiti dokumento mainaig iti imbestigasion iti maipagarup nga anomalya iti flood control projects iti opisina ti Ombudsman idiay Quezon City.
Simmangpet met ni Independent Commission on Infrastructure Executive Director Brian Keith Hosaka para iti pannakitaripnongna kadagiti opisial ti ahensia.
Maipalagip a naestablisar ti Independent Commission on Infrastructure iti babaen ti Executive Order No. 94 idi Setiembre 15, 2025 nga addaan ti probision a mabalin a maikkat ti komision no natungpalen ti gagem daytoy.
Kas fact-finding body, nangiwayat ti Independent Commission on Infrastructure kadagiti panagdengngeg, panangawat ti testimonia ken panangtingiting kadagiti ebidensia sakbay a mangirekomendar ti panangipila ti kaso iti Ombudsman wenno Department of Justice.
Indatag ti komision idi Pebrero 6 iti Malacañang ti 125-day report-da a nagresulta iti panangipila ti kaso kontra iti sumurok maysa a dosena nga indibidual pakairamanan dagiti dati nga agpanpanday linteg ken opisial ti Department of Public Works and Highways (DPWH) ken panang-freeze kadagiti sanikua nga agbalor ti sumurok-kumurang ₱25 bilyon.
Iti pakabuklan, nakaiparuk-aten ti Independent Commission on Infrastructure ti siam a referral a mangirekrekomendar iti kaso kriminal ken administratibo kontra iti 65 nga indibidual pakairamanan dagiti opisial ti Department of Public Works and Highways, Commission on Audit ken sumagmamano a contractor.
Iti agdama, ni laengen Independent Commission on Infrastructure chairperson Andres Reyes ti nabatbati a miembro ti komision kalpasan a nagikkat idi Disiembre ti dua a commissioner nga isuda Rogelio Singson ken Rossana Fajardo.
