LAOAG CITY – Mapatta-patta a ngumato iti P4 iti kada kilowatt hour ti nayon a singir iti kuriente inton bulan ti Abril basar iti Energy Regulatory Commission (ERC).
Inlawlawag ni Energy Regulatory Commission chair ken CEO Francis Saturnino Juan nga iti naiwayat a simulation ti Independent Electricity Market Operator of the Philippines (IEMOP) basar iti trend ti presio ti langis, rumrummuar iti potensial a panagngato ti P2 agingga iti P4 iti kada kWh.
Malaksid iti epekto dagiti panangatake iti oil-producing region, inkonsiderar pay ditoy ti nangatngato a demand iti panawen ti kalgaw ken posible nga outages kadagiti planta ti kuriente.
Maipakpakita iti simulation a manamnama a sumaruno nga agipangato ti presio ti thermal generator kagiddan ti panagngato ti presio ti langis kas paset ti cost recovery.
Immunan nga inrakurak ni Energy Secretary Sharon Garin a mabalin nga agresulta ti geopolitical tension iti 16% a panagngato iti electricity rates.
