LAOAG CITY – Binisita ni Mayor James Bryan Alcid dagiti atleta a makipaset iti Region 1 Athletic Association Meet.
Segun kenkuana, i-enjoy-da laeng ti panagsanay ken pannakilaban iti nasao nga sports competition.
Inbatadna a nakitana no kasano a kapursigido a mangabak dagiti atleta kadagiti nagduduma a tay-ak iti lubong ti ay-ayam.
Inlawlawagna nga iti babaen ti naiget a panagsanayda ket mamati nga adu manen dagiti pammadayaw a maiyawid dagitoy.
Kunana a saanna a kayat nga i-pressure dagiti atleta a maiyawid ti kampeonato tapno saan a maapektaran ti panagpokus dagitoy iti panagsanay.
Maipalagip nga agarup 700 nga atleta ti manamnama a makibinnalubal iti mapaspasangasangan a Region 1 Athletic Association Meet a maisayangkat inton Abril 9 agingga iti 11 idiay Candon City, Ilocos Sur.
