LAOAG CITY – Kinumpirmaran ni P/Col. Joemar Labiano, Provincial Director ti Ilocos Norte Police Provincial Office nga addan ti lima a gas station ditoy probinsia a nagserra gapu iti krisis ti langis gubuay iti agtultuloy a gubat idiay Middle East.
Segun kenkuana, kadagupan kadagiti 189 a gas station iti intero a probinsia ket lima ti naan-anayen a nagserra.
Inlawlawagna a ti kangrunaan a rason no apay a nagserra dagitoy ket gapu ta maibusanda ti suplay ti langis.
Nupay kasta, kunana nga awan met ti pangta a makitkitada a maibusan ti suplay ti gasolina dagiti nagduduma a paggasolinaan iti baet ti agtultuloy a panagngato ti presio dagitoy.
Kabayatanna, inpakaammo ni P/Col. Labiano a kasapulan pay ti pannakai-deploy dagiti kapulisan iti nagduduma a gas station tapno masigurado nga awan ti aggundaway iti presio dagiti produkto a petrolyo.
