LAOAG CITY – Nagballaag ti Department of Agriculture (DA) mainaig iti posible a dakkel a panagbaba ti produksion ti bagas iti pagilian a mabalin nga umabot iti 20 agingga iti 50 a porsiento no saan nga insigida nga agtignay ti gobierno.
Basar iti Department of Agriculture, daytoy ket gapu iti agtultuloy a panagngato ti presio ti abono gapu iti gubat iti Middle East a mangituntunda a nangatngato a gastosen iti produksion ken adda ti pangta a makaapektar iti panagmula inton sumaruno a bulan.
Iti panagdengngeg ti Senate Committee on Agriculture, Food and Agrarian Reform idi Mierkoles, kuna ni Agriculture Undersecretary Asis Perez nga agpegpeggad dagiti mula nga imula inton Mayo ken Hunio gapu iti kinakurang iti nalaka nga inputs ken inpettengna ti alisto a kasapulan a suporta para kadagiti mannalon.
Iti datos ti Department of Agriculture, posible a mapukawan ti 2 milyon a metric tons ti bagas wenno 20% ti produksion idinto a ti kadaksan a senario, mabalin nga umabot daytoy iti 50% a panagbaba a seryoso a pangta iti seguridad iti taraon ti pagilian.
