LAOAG CITY – Nangiparuk-at ti sumagmamano a pammalagip ti Department of Health (DOH) tapno maliklikan dagiti sakit nga itunda ti nabara a panawen kabayatan a ngumatngato ti temperatura.
Inbatad ni Health Secretary Ted Herbosa a mabalin nga umabot iti nasurok a 40 degrees kas ti prediksyon ti PAGASA.
Basar iti sekretaryo, napateg a pagtalinaeden a nalamiis ti bagi gapu iti possible nga heatwave a sumrek gapu iti El Nino.
Inpakaammo n a ti pinaka-vulnerable iti sakit nga itunda ti nakaro a kinabara ti panawen ket dagiti agtrabtrabaho iti ruwar a matuptupar ti darang ti init kas kadagiti vendor, street sweeper, construction worker,ken traffic constable.
Innayon na nga uray dagiti nataengan ken ubbing ket alisto a maapektaran ti nabara a panawen.
Inbalakad ni Herbosa a dagiti makapasar ti sakit gapu iti nabara a panawen ket masapol nga uminon ti danom wenno agdigos tapno mapalamiis ti bagi.
Kasapulan pay nga agsuot ti kallugong no rumuar wenno agarwat kadagiti napresko ken light color.
