LAOAG CITY – Inbatad ni Senador Imee Marcos a saan nga agpirma iti partial report ti Senate Blue Ribbon Committee mainaig iti imbestigasyon dagiti maipagarop a maanomalya a flood control projects ti gobierno.
Inpetteng ti senadora a maipagarop a kurang dagiti isaysayangkat nga imbestigasyon ti komite, aglalo kadagiti rumbeng a dumalan iti imbestigasyon nga itudtudo dagiti testigo iti panagdengngeg.
Segun ken ni Marcos, maallukoy laeng nga agpirma iti nasao a partial report no maaddaan ti sibubukel nga imbestigasyon ti komite iti maipagarop a korapsyon iti flood control projects ti gobyerno.
Maipalagip a nagpanawagan manen ni Senate President Pro Tempore Panfilo Lacson kadagiti kakadwa na iti Senado a pirmaan ti partial report ti Blue Ribbon Committee mainaig iti maipagarop a maanomalya a flood control projects kalpasan a nakaala laeng ti uppat a pirma manipod kadagiti miembro iti senado.
Inpaganetget ni Lacso a silulukat ti report iti interpelasyon dagiti kakadwa na isut gapuna a mabalin da ti agsaludsud ken amendaran no kasapulan.
Innayon na a kaadoan kadagiti rekomendasyon it report, karaman ti pannakaipadalan iti imbestigasyon ti sumagmamano a personalidad ket immunan a naipatungpal wenno agdama a tututukan ti dadduma nga ahensya.
Para met ken ni Senador Marcos, maipilpilit a gaburan ti kontrobersyal iti flood control projects scandal kalpasan ti pannakaitantan ti panagdengngeg koma ti komite idi Martes, Abril 13.
