LAOAG CITY – Nakasagana a mangsango a naragsak ni dati nga Ombudsman Samuel Martires no imbestigaren ti Karama de Representantes mainaig kadagiti alegasyon a maipagarop a nagawat ti minilyon a pisos a confidential funds manipod ken ni Vice President Sara Duterte.
Kagiddan iti daytoy, naglikudan na manen dagiti nasao nga alegasyon no sadinno nga inpetteng na nga awan ti makitkita na a rason nga imbestigaren da pay isuna gaputa saanen a paset ti gobierno.
Namonganay iti isyu iti sinapataan a palawag ni Ramil Madriaga, a nangibaga a maipagarop a nagdeliber ti pakabuklan a P125 million iti nagduduma a lugar, karaman iti opisina ti Ombudsman.
Segun kenkuana, ti kwarta ket maikabkabil kadagiti behikulo kas paset ti maipagarop a nakaugalian a wagas ti panagdeliber ti dadakkel a kantidad.
Kwinestyunaran met ni Martires ti kredibilidad ti nasao nga affidavit ni Madriaga, ken inpaganetget na nga awan ti rason tapno patuludan ti kwarta ti bise presidente.
Inpetteng na pay a saanna a sinuportaran ni Bise Presidente Duterte iti napalabas nga eleksyon.
