LAOAG CITY – Umabot iti 9 a tattao ti natay idinto a 28 a sabsabali dagiti nasugatan iti kaudian a Russian drone attacks iti Ukraine.
Basar iti report, ti kangrunaan a kagrabean a pinuntirya ti drone attacks ti Russia ket ti central Dnipropetrovsk region, no sadinno a walo nga indibidual ti natay ket 11 ti nasugatan.
Adda ti pakabuklan a 14 a rehiyon ti Ukraine ti naapektaran ti panagraot ti Russia.
Segun ken ni Ukrainian President Volodymyr Zelensky, nasurok a 100 a Russian drones ti naipabanto iti pagilian da, ken nagballaag iti possible nga ad-ado pay a panagatake kadagiti sumarsaruno nga aldaw.
Kabayatanna, kinumpirmaran dagiti opisyal ti Russia a natamaan ti gas processing plant ken dua pay nga industrial facilities iti tallo a rehiyon ti pagilian da kalpasan ti Ukrainian drone attacks, ngem awan ti nairekord a casualties.
