LAOAG CITY – Inpetteng ti Office of the Solicitor General (OSG) a saan a mabalin nga usaren ni Senador Ronald “Bato” Dela Rosa ti parliamentary immunity tapno maliklikan ti panangarestar kenkuana.
Basar iti Office of the Solicitor General, us-usaren laeng ti parliamentary immunity kadagiti kaso nga addaan ti pannusa a saan a lumabes iti innem a tawen a pannakaibalud.
Nupay kasta, ti kaso a crimes against humanity a maikonkonektar ken ni Dela Rosa iti babaen ti International Criminal Court ket addaan ti nadagsen a pannusa kas ti tungpal biag a pannakaibalud.
Kuna pay ti Office of the Solicitor General nga arig maipagarup a likliklikan ni Dela Rosa dagiti otoridad isu a saan a mabalin nga agkiddaw nga insigida ti tulong iti korte kabayatan nga awan isuna iti hurisdiksion daytoy.
Maipalagip nga idi Nobiembre, inrakurak ti Korte Suprema a ti maysa a pugante ket rumbeng a sumuko nga umuna sakbay a makakiddaw ti judicial relief iti korte.
