LAOAG CITY – Plano ni Ilocos Norte 2nd District Cong. Angelo Marcos Barba nga agbinnulig ti 2nd District office ken iti siudad ti Laoag para ti Tennis Clinic.
Segun kenkuana, daytoy ket tapno agbalin a provincewide sakbay a maaddaan ti tournament.
Inbatadna a makikoordinar daytoy iti Philippine Long Tennis Association gapu ta adu dagiti papagayamna iti daytoy nga asosasion ken patienna a matulonganda isuna tapno maipatungpal ti arapaapna para ditoy probinsia a maaddaan ti Tennis Clinic.
Kunana a ti tennis ket dakkel ti naitulongna kenkuana gapu ta naaddaan isuna ti direksion ti biag apaman a sinerrekna daytoy nga sports.
Inlawlawagna a daytoy ti rason no apay a kayatna a mapadasan dagiti ubbing ken kasta met dagiti nataenganen.
Inpettengna nga awan ti problema maipanggep kadagiti usarenda ken kabaelanda nga ipaay amin dagitoy basta adda ti gagarda nga agsursuro.
Maipalagip a daytoyen ti maikatlo a tawen a maisayangkat ti Tennis Clinic para kadagiti ubbing ken dagiti nataengan no sadinno nga iti umuna ket iti ili ti San Nicolas, Banna ken ita ket ditoy siudad ti Laoag.
