LAOAG CITY – Nagpanawagan ni House Senior Deputy Minority Leader ken Mamamayang Liberal (ML) Partylist Rep. Leila de Lima ken ni Presidente Ferdinand “Bongbong” Marcos Jr. nga isubli ti panagbalin a miembro ti Pilipinas iti Rome Statute ti International Criminal Court (ICC).
Nakailanad daytoy iti inpasa ni De Lima nga House Resolution No. 1056 no sadinno a kidkiddawenna pay iti Department of Foreign Affairs (DFA) a tratarendan dagiti addang tapno makapartisipar manen ti pagilian kas miembro ti International Criminal Court maiyallubog iti Konstitusion ken dagiti maiyannatop a linteg.
Nakaipalaon pay iti resolusion ni De Lima ti pananggutigot iti padana nga agpanpanday linteg a daytoy ket suportaran tapno mapapigsa ti pananglaban ti Pilipinas iti impunity and atrocity crimes ken panangitandudo iti dignidad ti amin ken panangipatungpal ti linteg.
Innayonna a mapatibker daytoy iti panangitandudo ti pagilian ti hustisia ken panagsungbat pakairamanan ti panangipaay ti proteksion iti karebbengan ti tao.
