LAOAG CITY – Inrakurak ti 11-member House prosecution panel a dagiti laeng pammilin iti babaen ti panangidaulo ni Acting Senate President Sherwin Gatchalian ti bigbigenda iti maisayangkat nga impeachment trial kontra ken ni Vice President Sara Duterte.
Inbatad ni Lead Prosecutor ken Batangas Rep. Gerville Luistro a kas paset ti institusion ti Kamara de Representantes ket surotenda no asino a liderato ti bigbigbigen ti Kamara de Representantes iti baet ti agtultuloy a panaginnagaw ti puesto iti Senado.
Nagballaag ni Luistro a ti maaddaan ti dua a paksyon ket mabalin a mangitunda ti pannakaulaw gapu ta saan met ikedkeddeng ti Konstitusion ti dua a panangidaulo.
Iti baet daytoy, mangnamnama ti prosekusion a masurot latta ti immuna nga schedule no sadinno a target nga isubmitir ti pre-trial brief inton Hunio 15, rugian ti pre-trial conference inton Hunio 18 ken pormalen a lukatan ti panangusig inton Hulio 6.
Inpaganetget da House Prosecutor Rep. Chel Diokno ken Spokesperson Rep. Renee Co a nakasagana ti panel ken nasken a rugianen ti panangusig tapno saan a mapaay dagiti umili a mangpadpadaanan iti panagsungbat ti Bise Presidente.
