LAOAG CITY – Nangabak ti Canada iti umuna a gundaway iti FIFA World Cup kalpasan nga inabakna ti Qatar iti score a 6-0 iti BC Place, Vancouver.
Ti naisangsangayan a panagballigi ket nangipakita ti nailian a selebrasion manipud kadagiti siudad agingga kadagiti nalalatak a landmark kas ti Niagara Falls.
Iti laban, indauloan ni Jonathan David ti koponan iti babaen ti hat-trick idinto a nangnayon dagiti goal da Cyle Larin ken Nathan Saliba pakairamanan ti maysa nga own goal manipud iti Qatar.
Dua a red card ti naipaay iti Qatar a nagay-ayam a kurang iti tao isut gapuna nga ad-adda a limmamang ti Canada.
Kagiddan ti balligi, rinibribu a fans ti naguummong iti Niagara Falls para iti viewing event.
Ti panangabak ket maibilang a naisangsangayan gapu ta daytoy ti umuna a gundaway a nakairekord ti balligi ti Canada iti FIFA World Cup kalpasan ti debut idi 1986 ken naminsan manen a pannakipaset iti 2022 nga agpada a saan a nangabak.
Malaksid iti panangipaay ti nailian a pammadayaw, manamnama a mangipaay daytoy ti nalawlawa nga interes iti football iti pagilian a tradisional a nakapokus iti ice hockey ken baseball.
