LAOAG CITY – Umaboten iti sumuruk-kumurang a 1.59 milyon nga indibidwal ti apektado ti magnitude 7.8 a gingined a timmama iti sumagmamano a paset ti Mindanao idi Hunyo 8.
Daytoy ket basar iti datos iti National Disaster Risk Reduction and Management Council (NDRRMC).
Segun iti NDRRMC, apektado ti 1,599,350 nga indibidual wenno 375,664 a pamilya manipod iti 580 a barangay iti Davao Region ken SOCCSKSARGEN.
Iti nasao a bilang, adda ti 22,109 a tattao a nagtalinaed kadagiti evacuation center idinto a 63,351 met ti naikkan ti tulong iti ruwar dagiti evacuation site.
Basar iti report ti ahensya, umaboten iti 77 dagiti pimmusay gapu iti napigsa a gingined iti rehiyon.
Nagtalinaed met ti 31 a sabsabali a mapukpukaw idinto a
1,339 dagiti nasugatan kas maibasar iti kaudian a datos.
Kabayatanna, agtultuloy a mamonmonitor ti perdisyon dagiti imprastraktura karaman ti 130 a kalsada ken 47 a rangyau a naapektaran iti Davao Region ken SOCCSKSARGEN, idinto a mapatta-patta nga 68,511 a balay ti apagapaman a nadadael ken 14,234 ti naminpinsan a naperdi iti Zamboanga Peninsula, Davao Region, SOCCSKSARGEN ken Bangsamoro region.
Umabot met iti ₱1.356 bilyon ti perdisyon iti imprastraktura, idinto a ₱318.66 milyon ti naibunong nga g ayuda manipod iti Department of Social Welfare and Development (DSWD), Office of Civil Defense (OCD) ken dagiti lokal a gobierno.
