LAOAG CITY – Ginutigot ni Department of Trade and Industry (DTI) Secretary Ma. Cristina Roque dagiti akinkukua dagiti babassit a negosio a makikoordinar iti ahensia tapno mabenepisiaran dagiti programa a makatulong iti panangpalawa ti negosioda pakairamanan ti panagserrek iti world market.
Inbatad ni Roque nga agtultuloy nga itantandudo ti administrasion Marcos ti panangpapigsa ti panag-export kadagiti produkto nga aramid ti Pilipino.
Inlawlawagna a ngimmato ti 15.4 porsiento ti balor ti exports iti napalabas a tawen a kangatoan a nairekord iti pagilian.
Kunana a nagtalinaed a napintas ti taray ti exports ita a tawen a paset ti epekto ti Republic Act No. 11981 wenno ti Tatak Pinoy (Proudly Filipino) Act a gagem a papigsaen dagiti lokal a negosio ken aramiden nga ad-adda a moderno dagiti industria iti pagilian.
