LAOAG CITY – Nangisayangkat ti funeral prayer ti tallo nga annak ti pimmusay a dati nga Iranian leader a ni Ayatollah Ali Khamenei, idinto a rinibo a tattao ken nangatngato nga opisyal ti nagatendar iti funeral ceremony iti Tehran, Iran.
Makita iti panagtitipon da Mostafa, Meysam, ken Masoud Khamenei nga agkarkarag iti sango ti lungon ti ama da iti dakkel a religious complex iti Tehran.
Nupay kasta, saan a nagatendar ti maysa pay nga anak ni Ayatollah Ali a ni Mojtaba Khamenei, a maibilang a para tawid kas sumaruno a Supreme Leader ti Iran.
Maipalagip a napapatay ni Ayatollah Ali Khamenei kadwa na ti naruay a miyembro ti pamilya na kalpasan ti insayangkat a panagbomba ti Estados Unidos ken Israel idi Pebrero 28, a nangitunda ti sumagmamano a lawas a gubat iti rehiyon sakbay a naaddaan ti temporaryo a ceasefire.
Iti nagbalin a seremonya, naidasar pay dagiti lungon dagiti dadduma a pimmusay a kabagyan ti dati a Supreme Leader, karaman ti anak na a babai, manugang ken maysa a 14 a bolan nga apoko na.
Nagatendar pay iti funeral ceremony dagiti nangatngato nga opisyal ti Iran kas kada Iranian President Masoud Pezeshkian ken Parliament Speaker Mohammad Baqer Qalibaf.
Kas paset ti panagladladingit, nangisayangkat ti Iran ti maysa a lawas a funeral procession para iti dati a lider ken ti pamilya na, karaman iti panangikabil ti bangkay iti sumagmamano a sagrado a lugar kadagiti Shi’ite sa Iraq.
