LAOAG CITY – Maibilang a duplicate ken saan nga original ti video ti maipagarup a panagpangta ni Vice President Sara Duterte a naiprisentar iti impeachment trial.
Inpetteng ni Senador Robinhood Padilla iti Facebook post-na, adda ti built-in a record iti Zoom ken ti host ti livestream ket mabalin a pinduten daytoy iti screen tapno maaddaan ti kopya ti Zoom meeting.
Kunana a daytoy ti maawagan nga original copy ken saan a ti video nga inparuk-at iti panangusig gapu ta kinopyada laeng manipud iti internet.
Inpaganetget ni Padilla nga aniaman a recorded a duplicate copy ti video ket mabalin a nasukatanen.
Binalakadan ni Padilla ni National Bureau of Investigation senior agent John Mark Calilung nga iti file koma a nagaramid ti Zoom meeting tapno ma-authenticate ti video ken saan nga iti internet.
Innayonna a trabaho ti imbestigador a sapulen ti raw wenno original recorded manipud iti creator ti meeting wenno ti Zoom.
