LAOAG CITY – Binabalaw ni Senator Panfilo “Ping” Lacson ti “recurring pattern” a pannakaospital dagiti maarestar a nangangato nga opisial a sumangsango ti criminal cases.
Kuna ni Lacson a kastoy ti napasamak manen iti pannakaarestar ti former Public Works Secretary Manuel Bonoan ken Senator Rodante Marcoleta nga agpada a sumangsango ti plunder ken graft charges.
Kunana a ti pannakaarestar ni Bonoan ket agpada met a napasamak kadagiti dadakkel nga indibidual no sadinno a na-confine iti hospital imbes kuma a maiturong iti pagbaludan nga inawagan ni Lacson a ‘pattern’.
Inbatad pay ni Lacson ti problema mainaig dagiti magasgasto iti pannakaospital ni Bonoan ken Marcoleta iti Philippine National Police-General Hospital (PNP-GH).
Inpettengna nga adda dagiti miembro ti Philippine National Police (PNP) dependents a saan a napalubosan a maipaayan ti pannakaagas iti Philippine National Police-General Hospital (PNP-GH).
Plano ni Lacson nga idatag ti problema bayat ti panagtaripnong mainaig ti proposed 2027 budget ti Philippine National Police (PNP) ken ti Department of the Interior and Local Government (DILG).
Kabayatanna, gagem ni Lacson a malawlawagan no sinno ti mabalin a ma-confine iti ospital kasta payen no siasinno ti mangigasto para ti non-dependent patients.
