LAOAG CITY – Inpakaammo ti maysa a Private Lawyer a ni Atty. Kidd Castro, Criminal Law Professor ti Northwestern University a saan a kasapulan ti pammilin ti Presidente sakbay a mangiwayat ti imbestigasion ti National Bureau of Investigation.
Daytoy ket kalpasan a naminsan manen nga inriing ti defense team no asino ti nangibilin nga imbestigaran ti panagpangta ni Vice President Sara Duterte.
Segun ken ni Atty. Castro, saan a kasapulan nga iyuray ti mandar manipud iti Presidente sakbay nga agtignay dagiti kameng ti National Bureau of Investigation iti panangiwayatda ti imbestigasion basta daytoy ket maiyataday iti linteg wenno pagannurotan.
Inbatadna a mabalin laeng a makibiang ti Presidente no adda ti makitana wenno mapaneknekan nga adda ti panangabuso iti bileg iti pannakaiwayat ti operasion ti ahensia.
Kunana nga awan ti makitana nga aniaman a problema iti panangiwayat ti imbestigasion ti National Bureau of Investigation gapu ta paset daytoy iti trabahoda nga agimbestigar apaman nga adda ti maawatda a reklamo.
Maipalagip nga inlawlawag ni National Bureau of Investigation Regional Director Jeremy Lotoc nga awan ti naawatda a direkta a pammilin manipud ken ni Presidente Ferdinand Marcos Jr.
Immuna iti daytoy, inpetteng ni Atty. Lotoc, moto proprio ti inaramidda nga imbestigasion ngem iti mismo nga aldaw a rinugian ti panangtingiting ket nakaawatda ti pammilin manipud iti Department of Justice.
