LAOAG CITY – Saan a mamati ti Malakanyang nga agpirma ni Vice President Sara Duterte ti waiver a palubusanna iti panang-access iti financial records-na ti baet iti naiget a rakurak ti legal team-na nga awan ti iduldulinna.
Inbatad ni Palace Press Officer Claire Castro a saanna a namnamaen a buluntario nga i-waive ni Duterte ti confidentiality ti bank ken sabali pay a financial records-na.
Ti pakainaiganna daytoy ket ti napasamak idi Nobiembre 13, 2024 congressional probe iti drug war iti napalabas nga administrasion idi gandaten a malwen ni Duterte ti mikropono ni dati a Senador Antonio Trillanes IV idi kinarit ti dati nga agpanpanday integ nga agpirma ti bank secrecy waiver.
Mainaig iti daytoy, inrakurak ni Atty. Michael Poa, defense spokesperson ni Duterte iti impeachment trial, ti panangibilin ti Anti-Money Laundering Council (AMLC) ken Bureau of Internal Revenue (BIR) nga idasar dagiti rekord ti Bise Presidente ket mangpuersa kadagiti opisial ti gobierno nga aglabsing iti linteg.
Kas sungbat, kuna ni Castro a ti kangrunaan a prinsipio iti impeachment proceedings ket ti agsapul ti kinapudno.
Gapu iti daytoy, kinarit ni Castro ni Duterte a panekneken nga awan ti iduldulinna.
Iti agdama, saan pay a nakaawat ni Presidente Ferdinand Marcos Jr. ti aniaman a kiddaw a lukatan ti sealed green box a naglaon ti tax records ni Duterte ken ti asawana iti prosekusion no sadinno a mausar iti impeachment trial.
Basar iti Section 71 ti National Internal Revenue Code ket kasapulan nga aprobaran ti Presidente sakbay a matingiting ti maysa a tax document.
Kabayatanna, ti commissioner ti Bureau of Internal Revenue ti adda ti kabaelanna nga agaramid ti nadakamat a kiddaw.
