LAOAG CITY – Naduktalan ni Mayor James Bryan Alcid a saan a direkta a nakontrata iti lokal a gobierno ditoy siudad ti Laoag iti maysa kadagiti coach wenno trainor nga agrekreklamo a saanna pay a naawat ti sweldona iti panangisuro iti programa a Just Be Active This Summer (JBA) program.
Segun kenkuana insigida a nagturong daytoy iti Community Affairs Office (CAD) tapno saludsoden no siasino daytoy nga agrekreklamo ngem basar iti nasao nga opisina ket awan met iti nakaikabil a naganna iti listaanda.
Mainaig iti daytoy kuna ti Mayor a posible a napasamak ket ti kinontrata daytoy iti Local Government Unit (LGU) ket nakasarita laeng tapno tumulong.
Kabayatanna kunana nga no adda dagiti reklamoda iti lokal a gobierno ket agturongda a mismo ditoy saan nga sabali iti pangidanunanda kas kuma iti Facebook gapu ta saan a masolbar daytoy iti social media.
Maipalagip nga adda iti nagsurat kenni Vice Mayor Rey Carlos Fariñas iti Facebook account-na mainaig iti saan pay a pannakaipaay ti sweldo dagiti coaches ken trainor iti Just Be Active This Summer (JBA) program ditoy siudad.
