LAOAG CITY – Nagpirma ti Pilipinas ken Estados Unidos ti maysa a lima a tawen a Health Strategic Objective Agreement a mangted ti agingga ₱42 billion para iti pannakaipapigsa ti panagagas iti human immunodeficiency virus HIV, tuberculosis (TB) ken mapasayaat ti health security ti pagilian.
Segun iti United States Embassy iti Pilipinas, ti nasao a katulagan ket napirmaan idi Hulio 22.
Iti salinong ti nasao a katulagan, mangiyallokar ti Pilipinas ti sumurok ₱30 billion iti uneg ti lima a tawen para iti pannkaipapigsa ti sistema ti salun-at, idinto a ti U.S. ket mangipaay met ti maipagarup sumurok ₱11.8 billion. Inpetteng ti U.S. Embassy a nakabasar ti katulaganda iti sumurok 60 a tawen a kooperasion iti nagbaetan ti dua a pagilian.
