LAOAG CITY – Agtultuloy ti lokal a gobierno ditoy siudad Laoag ti panangipaay ti kanayunan a pagsapulan dagiti residente kangrunaanna kadagiti babbai.
Segun ken ni Ms. Perlita Cabello, mangidadaulo ti City Social Welfare and Development Office CSWDO iti siudad ti Laoag a nangiwayatda ti skills development training para kadagiti babbai kas koma ti panagdait.
Kunana a 25 a miembro ti Kalipunan ng Liping Pilipinas KALIPI iti Barangay 25 ket dimmalanda ti training iti wrap around skirt making.
Inbatadna a ditoy a naisuro kadakuada ti panagaramid ken kangrunaanna ditoyen ti dekalidad a partuatda tapno alisto dagitoy a malako.
Innayonna pay dakkel a tulong daytoy a pagsapulan gapu ta tumulong pay ti lokal a gobierno ti siudad ti Laoag tapno maitampok ken mailako dagiti aramidda a produkto.
