LAOAG CITY – Sinuportaran ni Philippine Coast Guard spokesperson para ti West Philippine Sea Rear Admiral Jay Tarriela ti panawagan ni Defense Secretary Gilberto Teodoro Jr. mainaig ti panagikkat dagiti opisial ti gobierno a pro-China.
Kuna ni Tarriela a saan a kasapulan ni Teodoro ti panangibinsa-binsa kadagiti nasao nga opisial gapu ta kunana nga ammo da ti bagbagida no sinno ti saan a mangitakder ti posision ti Pilipinas iti West Philippine Sea.
Iti maysa a social media post ni Tarriela, inburayna dagiti 11 a pagalagadan a mabalin a mausar tapno maammoan no ti maysa nga indibidual ket traydor iti pagilian.
Dagitoy ket pakairamanan dagiti opisial nga agkedked nga itakder ti West Philippine Sea ngem imbes ket mangipapaay da ti panagballaag a mabalin a daytoy ti pagrugian ti rinnupak, dagiti agkomento a nasayaat no ti Pilipinas ket agbalin a paset ti probinsia ti China, ken dagiti mangiparparikna ti panagayat ken ni Chinese President Xi Jinping.
Mainaig iti daytoy, mamati pay ni Tarriela nga impluensiaan ti China ti politika ti Pilipinas iti babaen ti panagsuporta kadagiti opisial a saan a mangtaktakder iti West Philippine Sea.
