LAOAG CITY – Umaboten iti saan a nababbaba iti walo nga indibidual ti natay kalpasan ti awan sarday a panagtudo iti akindaya a paset ti Japan a nangitunda ti nakaro a panaglayus, panagregaay ti daga ken panagpukaw ti kuryente iti sumurok 20,000 a pagtaengan iti Chiba Prefecture.
Basar kadagiti otoridad, umaboten iti sumurok 100 millimeters iti kada oras ti iduduprak ti tudo idiay Chiba manipud idi malem ti Huebes ken agarup mamitlo a daras iti gagangay a kaadu ti tudo iti pakabuklan a bulan ti Agosto.
Gapu iti nalawa a panaglayus, rinibu a pasahero ti na-stranded pakairamanan dagiti pasahero iti Narita Airport idinto a nasuspenso ti dadduma a train services ken kangrunaan nga highway.
Sumurok 100,000 a pagtaengan ti nabalakadan nga agbakwit kalpasan a nangitunda ti panagreggaay ti daga ken panagpukaw ti kuryente ti napigsa a tudo.
Segun iti Japan Meteorological Agency, ti nakaro a panagtudo ket gapu iti panagsilpo ti nabara ken humid air flowing iti nalamiis nga angin iti atmosphere.
Kabayatanna, nagballaag dagiti otoridad nga agtalinaed ti risgo ti layus ken landslide iti lugar nupay naipababa ti emergency alert iti Level 4.
