LAOAG CITY – Immannugot ni Department of Public Works and Highways (DPWH) Secretary Vince Dizon ti rakurak ni Ombudsman Jesus Crispin Remulla a napaay ti ahensia iti panangipaay ti de-kalidad nga imprastraktura isut gapuna nga ad-adda a paboranna ti Public-Private Partnerships (PPP) para kadagiti kangrunaan a proyekto ti gobierno.
Ti Public-Private Partnerships ket pannakikoordinar ti gobierno iti pribado a sektor a mangipapaay ti kapital ken mangiwaywayat ti proyekto, kasukat ti panangibabawi ti investment iti babaen ti public funds, tolls, fees ken dadduma pay a charges.
Inbatad ni Remulla a nalawag ti kinakurang ti Department of Public Works and Highways iti kalidad dagiti proyekto kas ti P9 bilyon nga UP-PGH Cancer Center, baro a Bureau of Immigration (BI) building ken National Bureau of Investigation (NBI) headquarters.
Iti rakurak ni Dizon, inpettengna nga umanamong daytoy ken ni Remulla ken intudona ti internal systems ti Department of Public Works and Highways kas ramot ti problema.
Kunana a nabayagen nga ilunglungalongna ti Public-Private Partnerships gapu ta maipasigurado ti timeliness, high-quality ken cost efficiency a rumbeng laeng iti publiko.
Binabalaw ni Dizon ti baro a Bureau of Immigration building a kunana a “poorly executed” ken saanna a kabaelan nga akomodaren ti normal-sized vehicles iti driveway nga inawaganna daytoy nga “unacceptable” ken pammaneknek ti structural problems iti Department of Public Works and Highways.
Kabayatanna, nakasagana isuna nga isardeng ti proyekto ti NBI headquarters ken makikoordinar ken ni NBI Director Melvin Matibag tapno agbirok ti ad-adda a praktikal a pagpilian.
Inpasigurado ni Dizon a suportaranna dagiti singasing ni Remulla ken makitinnulong iti Ombudsman tapno agresibo nga ilungalong ti reporma iti Department of Public Works and Highways.
