LAOAG CITY – Nangipatungpal ti Malacañang ti alternative work arrangements kadagiti sumagmamano nga opisina ti gobierno kadagiti sumagmamano a lugar ditoy pagilian inton bigat, Agosto 20, gapu iti agtultuloy nga epekto ti napigsa a Southwest Monsoon wenno Habagat.
Malaksid iti daytoy, nabilinan dagiti private ken public a pagadalan a agaramatda ti alternative learning models ken dadduma pay a learning continuity measures tapno saan a matantan ti panagadal dagiti estudiante.
Basar iti Memorandum Circular No. 131, sakupen ti pammilin dagiti lugar kas kadagiti lugar a: National Capital Region, Abra,
Benguet, Ilocos Norte, Ilocos Sur, La Union, Pangasinan, Bataan, Bulacan, Nueva Ecija, Pampanga, Tarlac, Zambales, Batangas, Cavite, Laguna, Rizal ken Occidental Mindoro.
Naiparuk-at ti pammilin kalpasan ti rekomendasion ti National Disaster Risk Reduction and Management Council (NDRRMC), kas panagsagsagana iti manamnama nga agtultuloy a napigsa a panagtudo gapu iti Habagat.
Nupay kasta, masapol ti panagtultuloy ti operasion dagiti ahensia a mangipapaay ti basic ken health services, disaster preparedness ken response ken kasta pay kadagiti dadduma pay a nasken a serbiso ti gobierno.
Kabayatanna, makaawat latta ti sueldo dagiti Contract of Service (COS) ken Job Order workers babaen iti alternative work arrangements.
