LAOAG CITY – Umaboten iti P1.79 billion a gatad ti nadadael iti sektor ti agrikultura gapu iti nagtipon nga epekto ti habagat ken dagiti naglabas a bagyo Luis, Maymay ken Neneng.
Basar iti Department of Agriculture, umaboten iti 51,229 a mannalon ti naapektaran gapu iti nasao a saan a napintas a sasaaden ti panawen.
Malaksid iti daytoy, naiparuk-at pay ti datos ti Disaster Risk Reduction and Management Operations Center (DRRM-OpCen) a 41,647 nga ektarya a pagtalunan ti naapektaran ken nadadael.
Nairekord pay ti 44,745 a metriko a tonelada dagiti produkto ti nasayang gapu iti epekto dagiti bagyo.
Kabayatanna dagiti lugar a naapektaran ket pakairamanan ti Ilocos Region, Cordillera Administrative Region, Cagayan Valley, Central Luzon, CALABARZON, MIMAROPA, Bicol Region ken ti Western Visayas.
