LAOAG CITY – Nasentensiaan a maibalud idiay England ti maysa nga agtawen 50 a lalaki a bulsek kalpasan a nagmaneho iti agarup 240 a kilometro bayat a nabartek.
Nabigbig ti lalaki a ni Anthony Hall ti Huddersfield. Isu ket natiliwan dagiti polis kalpasan a nadlawda nga agbalbaliw ti lane daytoy iti Vauxhall Meriva a minanehona.
Segun iti korte, innala ni Hall ti kotse ti partner-na nga awan ti pammalubosna. Inamin ni Hall nga isu ket nakainum iti arak.
Kuna met ni Hall kadagiti polis a dua a tawenen a bulsek ngem makakita pay laeng iti lawag. Bayat ti kaaddana iti motorway, sinurotna laeng ti silaw ti dakkel a trak tapno maammuanna ti papananna.
Nagmaneho agingga iti 240 a kilometro sakbay a pinasardeng dagiti otoridad. Kinunana a planona pay laeng ti agtultuloy idiay Scotland. Ti distansia a 240 a kilometro ket maipada iti panagbiahe manipud Cubao agingga iti Baguio City.
Nasentensiaan iti walo a bulan a pannakaibalud, ngem nasuspende daytoy ti sentensia iti agingga 18 a bulan. No tungpalenna dagiti kondision ti korte ken saan a makaaramid iti sabali a krimen, mabalin a saanen a maibalud manen.
