LAOAG CITY – Inikkaten ti Bureau of Internal Revenue (BIR) ti Value-Added Tax (VAT) manipud iti allowable system loss charge kadagiti electric bills, iti babaen ti Revenue Memorandum Circular (RMC) No. 97-2026 a naipaulog idi Mayo 14, 2026 ti panangidaulo ni Commissioner Charlito Martin R. Mendoza.
Iti babaen ti nadakamat a sirkulo a mangipatungpal iti ERC Resolution No. 26, Series of 2026, naideklara ti allowable system loss charge kas pass-through cost nga mandado ti gobierno a saanen a mairaman iti gross sales para iti VAT computation, isut gapuna a saanen a maipaulog iti output VAT ken creditable withholding iti VAT.
Segun ken ni Commissioner Mendoza, daytoy nga addang ket iti babaen ti pammilin da Presidente Ferdinand R. Marcos Jr. ken ni Finance Secretary Frederick Go, a daytoy ket mangipatungpal kadagiti praktikal a solusion tapno mapalag-an ti dagsen dagiti umili iti nangato a presio dagiti tagilako ken singir iti koriente.
Inlawlawag ti BIR a tapno maipangpangruna ti transparency, nasken a maisina ken nalawag a maipakita ti system loss charge kadagiti billing statements ken invoice kadagiti generation companies, National Grid Corporation of the Philippines (NGCP), distribution utilities, ken electric cooperatives.
