LAOAG CITY – Inpublikar ti Department of the Interior and Local Government (DILG) ita nga aldaw ti baro a mugshot ni dati a House Speaker ken manarimaan a Leyte 1st District Rep. Martin Romualdez.
Napasamak ti pannakaala ti ladawan kalpasan ti pannakaikabilna iti New Quezon City Jail iti Payatas idi kalman ti rabii, Setiembre 14, kalpasan ti pammilin manipud iti Sandiganbayan Third Division.
Segun ken ni Bureau of Jail Management and Penology (BJMP) spokesperson Jayrex Bustinera, agtaltalinaed ni Romualdez iti infirmary ward ti pasilidad kaduana dagiti tallo pay a persons deprived of liberty (PDLs).
Ti nagbalin a desision iti nakaibaludanna ket basar iti panangtingiting ti doktor kenkuana ken ti independent doctor manipud iti Philippine General Hospital (PGH).
Mainaig iti daytoy, inbatad ti pannakangiwat ti BJMP a saanen a masapol ni Romiualdez nga agtalinaed iti ospital gapu ta kabaelan ti BJMP nga ipaay ti medical atension a kasapulanna bayat a nakadetine daytoy.
Kabayatanna, naikeddeng a sumango ni Romualdez iti arraignment ken pre-trial proceedings iti Sandiganbayan inton bigat, Setiembre 16.
Maipalagip a sumangsango ni Romualdez iti kaso a plunder iti anti-graft court gapu iti maipagarup kickbacks nga umabot iti sumurok P7 billion manipud kadagiti nagduduma a proyekto ti gobierno.
