LAOAG CITY – Mangisayangkat ti caucus ita nga aldaw ti Lunes, Setiembre 21, dagiti senator-judge tapno trataren ti mausar a voting threshold iti panagdesision no guilty wenno mapaawan basol ni Vice President Sara Duterte iti agtultuloy nga impeachment trial-na.
Mainaig iti daytoy, segun ken ni Senator-Judge JV Ejercito a tratarenda iti causus wenno taripnong no kasapulan a dumalan iti panagbotos ti intero nga impeachment court ti kaso wenno mabalin daytoy a resolbaren ti presiding officer iti babaen ti consensus dagiti miembro.
Inbatad ni Ejercito nga agkasapulan pay daytoy ti umdas nga oras tapno tingitingen dagiti opinion dagiti amici curiae wenno resource persons iti napalabas a lawas sakbay a mangiparuk-at ti pormal a botos.
Inpettengna a ti kangrunaan ket awan ti malabsing a probision iti Saligang Batas.
Kabayatanna, patien ni Senator-Judge Panfilo “Ping” Lacson a saan a rumbeng nga iyalisto ti panagdesision ken posible a saan pay a maaddaan ti panagbotos inton Mierkoles, Setiembre 23, aglalo no adda agkiddaw ti kanayonan a panawen tapno matingiting dagiti panagsarsarita kadagiti maisayangkat nga oral argument.
Nupay kasta, saan a nangipaay ti rakurak ni Senate President ken Presiding Officer Sherwin Gatchalian tapno saanna a maunaan ti resulta ti panagtratar iti caucus.
Manamnama a ti agbalin a resulta ti taripnong ita nga aldaw ket agbalin a panangibasaran kadagiti sumaruno nga addang iti Senate Impeachment Court sakbay ti pormal a panagdesision iti kaso ti Bise Presidente.
