LAOAG CITY – Umaboten iti 23 nga indibidual ti natay gapu iti napigsa a panagtudo ken nakaro a panaglayus idiay Thailand manipud idi Setiembre 16, kabayatan a nangitunda pay ti nasao a kalamidad ti aberya iti biahe ti eroplano iti Bangkok.
Basar iti Interior Ministry ti Thailand, karaman kadagiti natay ket dagiti uppat nga indibidual manipud idiay Bangkok no sadinno nakapasar ti nasao a lugar ti layus kalpasan a nakairekordda ti sumurok-kumurang 320 millimiters a tudo iti uneg laeng ti tallo nga aldaw.
Malaksid kadaytoy, umabot iti 42 a probinsia ti naapektaran gapu iti nasao a panaglayus, kabayatan nga agarup $367 million ti nairekord a gatad ti nadadael iti dua a dosena a probinsia.
No man pay agtultuloy ti operasion ti airport ti Bangkok, makapaspasar ti nakaro nga aberya ti Suvarnabhumi Airport kalpasan a saan a nakastrek iti trabaho dagiti sumurok-kumurang kagudua dagiti pakabukelan a personnel ti Thai Airways gapu iti panaglayus.
Gapu iti daytoy, segun iti airline, masapol a kissayanda ti sumurok-kumurang 30 a biahe wenno 30% a naikeddeng a departures manipud Bangkok idi Martes.
Kabayatanna, inaprubaran ti gobierno ti Thailand ti sumurok 4 billion baht para iti insigida a panagtignayda iti epekto ti nasao a layus.
