LAOAG CITY – Natiliw ti maysa a lalaki idinto a nakataray ti kadwa na iti naiyuswat nga illegal drug buy-bust operation iti ili ti Solsona.
Binigbig ni Police Capt. Randy Damo, ti chief of police iti ili ti Solsona ti suspek ket agtawen ti 29, maysa a mannalon ken residente ti Brgy Maananteng iti ili ti Solsona.
Segun ken ni Damo, inarestar a dagus dagiti otoridad ti suspek kalpasan a linakoan na ti nagpammarang a poseur buyer ñ ti maysa a sachet a naglaon ti mapapati a shabu nga agdagsen 1.83 grams nga addaan standard drug price a P12,444.
Iti panangkapkap dagiti otoridad iti suspek ket nakalumpiskar da pay ti tallo a sachet ti mapapati a shabu nga agdagsen ti 5.94 a gramo nga agbalor ti P40,392.
Malaksid kadagitoy ket naala pay manipud ti ikot ti suspek ti dua a pedaso ti improvised tooter, maysa nga P1,000 bill a nausar kas buy-bust money, dua a lighter ken dadduma pay a personal a gamit ti suspek.
Ti agdama, maisagsaganan ti kaso a panaglabsing ti Republic Act 9165 wenno Comprehensive Dangerous Drugs Act of 2002 kontra iti suspek.
Kabayatanna, inbatad ni Police Capt. Damo a nabigbig da met ti nakataray a kadwa ti suspek isut gapuna a manarimaanen ti ipatpatungpal da nga hot pursuit operation kontra kenkuana.
