Kiniddaw iti Sandiganbayan Third Division ni dati a Senador Ramon “Bong” Revilla Jr. ken ti pada na nga akusado a ni JP Mendoza, a mapalubusan da nga agpila ti mosyon tapno maibasura ti P92.8-million malversation case kontra kadakuada, mainaig iti maanomalya a flood control project iti Pandi, Bulacan.
Basar iti Sandiganbayan Third Division, nagpila ti kampo ni Revilla ti motion para iti leave of court a nakaipalaonan ti demurrer to evidence
Ti demurrer to evidence ket maysa a pleading a mangkidkiddaw iti korte ti pannakaibasura ti kaso gapu ta awan ti umdas ken natibker nga ebidensya.
Naipalaon iti mosyon ti kampo ni Revilla a ti pannakatingiting kadagiti testimonial ken documentary evidence ket mangipakpakita nga awan ti umdas nga ebidensya a mangpaneknek kadagiti alegasyon kontra iti dati a senador.
