LAOAG CITY – Inbatad ni Vice Mayor Remigio Medrano iti ili ti Sarrat a manarimaan ti pannakaimplementar ti nagtutulagan a presio weight ti baboy dagiti hog raisers.
Kunana a daytoy ket aggatad ti P150 iti kada kilo.
Nupay kasta, inpaganetgetna a saan nga ikomparar ti presyo ti live weight ti baboy kadagiti kabangibang a lugar kas iti ili ti Vintar ken siudad ti Laoag nga iti agdama ket agpresio ti P180 ti live weight gapu ta nakabasar daytoy iti law of supply and demand.
Naamoan a basar iti agdama a datos ti Municipal Agriculture Office a ti pakabuklan nga inventory dagiti ‘ready for selling’ wenno mailako a baboy ket nasurok 2,000 nga ulo ken manamnama pay dagiti burias a sumarsaruno a mapadpadakkel.
Mainaig iti daytoy, dinakamatna a ngumato met ti gastos dagiti hog raisers iti panangtaraken ti baboy no agbayag.
Kabayatanna, ipangpangruna ti bise mayor a lappedan ti over supply ti baboy ken ti naan-anay a panangtulongda kadagiti hog raisers tapno maliklikan ti pannakalugi.
