Nagturong ti nauruay a kailian iti merkado publiko iti siudad ti Laoag tapno gumatang kadagiti sabsabong ken kakanin nga iyatang kadagiti pimmusayen a kameng ti pamilyada kabayatan ti panagbisitada kadagiti kamposanto.
Nangrugi a nagpeesto dagiti aglaklako ti sabsabong ken kakanin iti igid ti merkado itay bigat ken agingga ita ket nakapuesto dagitoy.
Basar ti kadagiti sumagmamano nga aglaklako ti kakanin, naamoan a ti kangrunaan a gatgatangen dagiti umili ket ti suman, patupat, ken puto.
Mainaig iti daytoy, awan met ti dakkel a nagbaliwan ti presyo ti lakoda a kakainin ngem no adda man pagngatoan na ket umabot laeng ti P5 agingga P10 laeng.
Dagiti met aglaklako ti sabsabong ket adda met ti nagduduma a disensyoda ken wagas tapno mapapintas ken mapagtalinaed a nalangto ti sabongda.
Inbatad ti maysa nga aglaklako a nakasarita ti Bombo Radyo, nga ikabkabilda nga insigida ti supot iti sabongda tapno ma-trap iti moisture a mangpalangto ti sabong kalaksidan ti foam nga adda danomna a nakaitudokan daytoy.
Kunana pay presyo ti sabong da ket P200 ti kababaan depende ti disenyo ken kinagarbo na.
Malaksid iti daytoy, adda met dagiti dadduma pay nga aglaklako ti sabong nga addaan ti kababaan a lako nga aggatad ti P100.
